फलटणमधील काही शाळांमध्ये कोचिंग क्लासेस नियमावलीचे उल्लंघन, अकॅडमी व्यवसाय बोकाळले,पालक हैराण ; शाळांमधील अकॅडमी बंद करा अन्यथा आंदोलन– सनी काकडे 

फलटण – फलटण शहरातील अनेक खासगी आणि अनुदानित शाळांमध्ये विद्यार्थ्यांकडून अत्याधिक फी वसूल करण्यासाठी अकॅडमी बसवण्याची प्रथा वाढत चालली आहे. शासनाच्या अनुदानित शाळांमध्येही, या अकॅडमींचा प्रादुर्भाव होऊन विद्यार्थ्यांच्या पालकांकडून मोठ्या प्रमाणावर आर्थिक लूट सुरू असल्याचे चित्र दिसून येत आहे. पालक वैतागले असून शाळांचे संस्थापक आणि अकॅडमी मालक यांनी शाळांमध्ये अकॅडमी बंद न केल्यास तीव्र आंदोलन करण्याचा इशारा  सामाजिक कार्यकर्ते आणि कामगार संघटनेचे  सनी काकडे यांनी पत्रकाद्वारे दिला आहे.

फलटण मध्ये काही शाळांमध्ये सुरू असलेल्या अकॅडमी बिनमान्यता असून, त्यांचा अभ्यासक्रम आणि शिक्षणाच्या पद्धतीवर सरकारने ठरवलेल्या नियमांचे पालन होत नसल्याचा गंभीर प्रकरण आहे. यामुळे विद्यार्थ्यांचे मानसिक संतुलन बिघडते आणि वर्गांमध्ये भेदभाव निर्माण होतो. विशेषतः पहिली ते दहावीत शिकणाऱ्या मुलांना मूलभूत गोष्टी समजत नसतानाही, त्यांच्यावर According सक्ती केली जाते व अधिक शुल्क उकळले जाते. शाळांमध्ये अकॅडमी सुरू करण्याची प्रथा चुकीची असून शिक्षण विभाग झोपा काढत आहे का असा सवाल सनी काकडे यांनी केला.

शाळांमध्ये शिक्षकांमध्ये शिक्षण देण्याच्या पद्धतीत कमतरता असल्यास, त्या शिक्षकांना हकालपट्टी करण्याऐवजी अकॅडमी चालवण्याचा धंदा सुरू ठेवला जात आहे. कामगार संघर्ष संघटना या प्रकाराच्या अकॅडमींचा प्रखर विरोध करत असून, स्थानिक गट शिक्षण अधिकारी व दंडाधिकारी यांच्याकडून त्वरित कारवाईची मागणी करणार आहे.

भारत सरकारने जाहीर केलेल्या कोचिंग क्लासेस नियमावलीचे पालन फलटणमधील अकॅडमीमध्ये होत नसल्यामुळे शासनाने त्वरित या अकॅडमी बंद करण्याचे आदेश द्यावेत आणि शाळांची चौकशी करावी अशी संघटनेची मागणी आहे. अन्यथा कामगार संघर्ष संघटनेकडून आंदोलन करण्यात येईल असा इशारा सनी काकडे यांनी दिला आहे.